النكلهّ ... و الشيخ الديب
19 أبريل 2009 by: trtr388
قريتى اسمها نكلة تبعد عن القاهرة حوالى 30
كم
-1-
واِكمنى من نكلهّ..
سالنى ابنى النكلهّ ايه..؟!
عقلى سرح فى ايام بعيده من زمان
ايام طفولتى فى قريتى
ايام ماكانت ولدتى تدينى نكلهّ
اشترلها زيت وجاز
وكنت اشعر بامتياز
بين كل اولاد قريتى لو خدتها مصروف فى عيد
-2-
واكون سعيد لو رحت مره افُكها
اخد بدلها ملمين
اعملُ لهم كيس من قماش
واحطة فى الجيب الشمال ومرة فى الجيب اليمين
وايدى تبقى الف ايد
وعينى تبقى الف عين
وقلبى جامد بالقوى زى الحديد
والخوف ما بعرف سكته
واقتل قتيل ومعايا ادفع ديته
-3-
وفجأة فوقنى الولد..
سارح فى ايه..؟
انا قلت له .. لا لاء ما فيش
وسالنى يابا ما قلتليش النكلهّ ايه..؟
ورجعت تانى وقلت له :
النكلهّ جزء من الجنية
اما الجنية ..كان يبقى مصروف الف عيل من البلد
فاكر ابويا اشترى اردب قمح
وفاض ريال .. من الجنيه ..!!
كان لما ابويا يشترى كسوة خواتى
الف رحمه ونور عليه
كان يشترى كل الكساوى بالجنية
كان القماش المتر منة بقرش صاغ
كان الجنية بيجيب دهب ويجيب مساغ
كان الف مليم بالتمام
والنكلة كانت ملمين
-4-
قال اية ده كله..؟؟!!!
يابا الجنية عصفور فى ايدك فجأة طار
يابا الجنية زى السبرتو لما طار
هو الجنية بيجيب يدوب غير كيس فشار
اونص كيلو من الخيار
يا با الجنية صبح ركوبه للدولار
زى الحمار
وتقولى نكلهّ فى قريتى
غيرها يابا
غيرها يابا .. الكل غير نكلتهُ
وصبحت دولار
انا قلت له ..
ريحنى يا ابنى فى تربتى
وكتبت لة فى وصيتى
اوعاك تغير نكلتك
بلدك امانة فى ذمتك
اوعاك تغار
اوعاك تغيرها بدولار
او حتى مية مليون دولار
بلدك امانة فى ذمتك ..
اوعاك تغير نكلتك.....
شعر الشيخ : امين الديب
